Laimi le Hngatchan Nun

Dear, Vawleicung khuaza vantoi ummi kan miphun hawihna “Bethlehem Chin Church Webside” in nan kut kan in tlaihhna, Kan Webside a kan lengtu nan cungah Pathin thluachuah vanluhnak um hramseh!  Mah a tanglei cabia pakhat kan rak ciahmi hi Pu. Victor Khen Sang tialmi “Laimi le Hngatchan Nun” Timi a si, ruahphu le relphu taktak a si ti ah karuah. Hi a tanglei capar hi a tialtu, Pu. Victor Khen Sang hnathlaknak hal hnuah amah lungtling tein ciahmi asi.


Laimi hi Pathian aduh ngaimi cu kan si ko. Amahbelte mah pumpak nih Pathian hi kan i ngeih cio ding mi kha pastor le evangelist nih ngeih piak mi bantuk khin anmah cawnpiak nak ah kan i hngatchan tuk caah pumpak cio in Pathian biaknak kong ah kan chambaunak atam ngai tiah ka ruah. “Dependency Creates Poverty” hngatchan nun nih sifaaknak achuah pi, ti asi i hngatchan nun timi ah hin Laimi hi kautuk in kan nung. Biaknak lawng hlah, innchungkhar ah minung pakhat ramdang aum ahcun adang vialte nih rianțuan ti loin amah kuat mi rinh bak in kan nung, sahlawh rualchan vialte nih vun i hngatchan chih asi rih. Biaknak zong ah mi cawnpiaknak cung ah kan i hngatchan tuk caah kan mah pumpak nun kan sifah nak asi.

Pastor/evangelist pawl cawnpiaknak kan i rinh tuk caah camping le crusade timi nih kan zatlaang nunpi hrimhrim hi akan dawpdolh ngai ngai ko. Milem le pura ah pathian aum rua tiah abiami pawl nih dawh tein milem le pura hmai ah pathian an biak bang kan nih Laimi zong hi zeimaw caan ahcun kan biakinn lawng ah Pathain aum rua ti awk in biakinn kal caan ahcun dawhtuk in kan i țamh hmasa i biakinn hi kan milem umnak ko alawh caan atam cang ko hih. Biakinn hi siapuazi tuahnak hmun le fashion show piaknak hmun men bantuk ah kan hman sual ahcun milem le pura bantuk menmen cu asi ko hnga.

Oneness le trinity nak in abiapi deuhmi cu ka nunnak thinlung ah hin Pathian umnak ațha dingmi hmun ka si maw ti itheih kha ahau deuh tukmi asi. Hell tlaak le vanram kai timi zong ah hin nung nain thih nun tluk asimi nun ngeih țung ahcun oneness le trinity si kha zeihmanh san atlai hnga lo. Kan nih cu oneness silole trinity zum mi kan si ti țung i mah chuahpi unau le innchungkhar hmanh ah bia hmanh i chonh khawh ti lo, biakinn chung i pumh zong ah pulpit cung chim mi paoh kha achiatnak lei in lungthin te ah rak i koih cio i lenglang lawng in “Halleluijah, Amen” hei ti fawn. Pumpak cio kan nunnak ah Khrifa kan si kan ti bu in kan nun tha abaat tuk peng ahcun cucu hell tlaak pei asi cu.

Cucaah Laimi hi pumpak pakhat cio Khrifa kan sinak ah hin Thlarau lei chambaunak “Spiritual Stress” timi kan ngei tuk hna ti hi kei cu ka hmuh ning cu asi. Cu chung ahcun kan nun hi sivaang in kan vahvaih caah Kawl nih “Hu ma zoh, Di ma zoh” timi ‘khika phanh hrawt lo, hika hin le um fawn lo’ in kan i tengtele dih hna. Cucaah Pathian nih “Ngai hmanh, Innka ka kingh” atimi khi mah pumpak nun ah Pathian kha luhter hmasa hnu ah amah nunpi kha zeizong vialte lak ah aherh bikmi cu asi ko tinak asi. Pathian cu minung thinlung ah umnak akawlmi asi i kan thinlung ah umnak kan chiah piak lo ahcun mi thil hlang dirhmun in nunpeng he kan i khat ko hnga. Minung khua kan saknak nitin kan vulei ah hin vanram zong aum i hell zong aum.

Bible hi voi thongkhat rel zong ah second pakhat hmanh cat loin kan nunnak innka a king zungzalmi Pathian authawng cu ka hun piak țung lo ahcun zei Pathian cu dah kan nunnak cio ahcun alut kun hnga. Laimi tluk in Pathian thawngțhabia atheimi hi an um hnga hme maw, hi lengluang kan theih cang ko i hihi kan si komi cu “hngatchan nun” ah pumpak nunnak aum lo ti kan i fian duh lo caah asi ko. Laimi hi biaknak ah zapi peih in kan peih viar nain atawne tla țung loin acungpalang ah kan vuanh dih caah hi nih hin kan biaknak(religion), sipuazi(economic) le ramkhel(politics) tiang ah cungtang phan loin akan vaivuanh dih nak hi asi.

Laimi pumpak pakhat cio nih kan theih bikmi (Knowledge) atambik cu Khrifa biaknak kong asi nain lente ah kan i celh nak cang. Lungvar cu zeitluk mansung asi hmanh ah vokpi hmai na chiah ahcun man ngeilo asi bantuk in hitluk dawtnak, fimnak le zungzal nunnak asi komi Pathian bia kan hmai aum ko mi, hiti luklak cio in lentecelh in kan i celh pi cio ko mi hi cu țihnung tumsuum tuk asi ko. Ei cawk lo, hman cawk loin kan i țhatchuah pi ding mi thluachuah vanluh pi tu hi faak tuk le tuar khawh lo tiang in kan i chiatchuah pi sual te lai ti phan aum hringhran ko.

Mah pumpak pakhat cio ah nunnak taktak cu aum i cu nunnak cu Pathian pekmi zungzal nunnak lawng hmanh si loin hi vulei nitin kan khuasaknak ca zong ah chapchih mi “Bonus” hlawtnak zong asi chih ti kan theih hrimhrim i kan nunpi ahaumi asi. Pumpak thinglung cio ah Sipuazi lungput bak anunpi mi Tuluk pahnih an umnak ahcun company pakhat an dirh khawh bantuk in Khrifa nun dik angeimi Laimi pahnih kan umnak hmun ah biakinn pakhat kan dirh khawh ve tik khi Laimi cu Khrifa kan si tiah hmaihngal tein kan i ti ngam te ding khi asi hnga.

Careltu nan zapi cung ah ka lawm.

Upatnak he,

Victor Khen Sang
May 2, 2018

Image may contain: 1 person, standing and text
LikeShow More Reactions

Comment

12 comments
Comments
Awte Obed
Awte Obed Ka piang thar colh, hi hlei Evan Tha hi pathian nih in hmang chin leng Mang ko seh U khen Na ca Tial mi rel nuam mifim ciam mam ca Tial lawng si ti loin Hmun kip ka kip ah a Thawng Tha au pi Ding zong in pathian nih in hmang hram seh

2

Manage

LikeShow More Reactions

· Reply · 3d

William HC
William HC Na ttialmi hi Laimi Krihfa huat phun si,a ruang cu Laimi krihfa kan sining in na ttial,Laimi Krihfa aa timi hna kan nun hi hun ruah tikah Tangka dihheu hnuah Pianthar tim in kan um caan a tawi ti lo mi ruahah a poi ngai ko,Tangka liam le dihheu hnu lawngah Pianthar kan itimh mi nih hin sifahrai a tlunh ve ti kn ruat kho ruam rih lo,na cabia a rel nuam tuk.

Manage

LikeShow More Reactions

· Reply · 2d

Dawt Hniang
LikeShow More Reactions

· Reply · 2d

Stanley Ngun Su
Stanley Ngun Su Laimi kan nun a kan remhtu catluan ah cang hramseh.

Manage

LikeShow More Reactions

· Reply · 2d

AS KA
AS KA A tha ngai.

Manage

LikeShow More Reactions

· Reply · 2d

Bawi Nu
Bawi Nu Tha tuk van tial leng ko

Manage

LikeShow More Reactions

· Reply · 2d

Salai Lairamthang
Salai Lairamthang Pa Khen. Ka Kawi pa nih Laimi cu mahte in Pathian sin ah direct in thlacam ko dingmi thlacam thiam ee. Evangelist ee tiah puaisa bang kan fialmi hna hi Pathian a lungtlin lai ka zum lo a ti bal.

Manage

LikeShow More Reactions

· Reply · 2d

Victor Khen Sang
Victor Khen Sang Sung Sung pa @ Salai Lairamthang Mah atang i link kan kuat mi Video i phungchimmi hi Rev. Ben Volman ti asi i amah hi Zudah miphun asi i cathiam tuk arak si. Toronto University in Master adih i scientist si ding in cacawn apeh hniSee moreManage
LikeShow More Reactions

· Reply · 2d

Victor Lian
Victor Lian 100% bak in kaa hrawm. A diktuk ka uartuk fawn. Pasalttha/ Patling dik ruahnak ciamam. Upatnak kan pek hmailei zongah tampi rak kan tial piak hram law

Manage

LikeShow More Reactions

· Reply · 2d · Edited

Perhkalh Thawng
Perhkalh Thawng Laimi that lonak lawng a chimmi pa an in ti ve te sual lai maw cu. Hihi atulio Laimi kan sining bak cu a si ko. Na ca ka rel i ka hna a thiang ngai bantuk in ka um. Zahan Liverpool nih Roma an tei fawn hna.

Manage

LikeShow More Reactions

· Reply · 2d

Ngun Sui Mawi
Ngun Sui Mawi A tha kho tuk e, kan i lawm tuk, Bawipa nih in um pi ko seh

Manage

LikeShow More Reactions

· Reply · 2d

Jimmy Ling
Jimmy Ling Philosopher pakhat na si ko. Laimi kan lungput le dirhmun, mah lemah hei i seihchiahngai ttung i chunglei nun kan chamhbau ning hi mu…..Pathian nih cun chunglei dahkaw azoh cu…
A tha tuk… God bless!

Manage

A THO TTHAN! A NUNG A NUNG!

Zultu le an hawile vialte hna cu ngaihchia tein lanhtak Puai zarh cu an ul. An lungchung ah zeidang bia a chuak kho lo. An Bawipa nih a thihtak hna, Isarel miphun Khamhtu ah an rak ruahnak vialte pakpalawng I a can than dihnak lawng kha an ruat. Misin ah zeitindah bia an chim lai. An zulhmi Jesuh cu mikhamh kho Mesiah a si kun rua lo cu.Tlangbawi le Farasi hna bia kha maw a hman deuh ko kun. Khuaruahharnak a rak ser mi vialte hawi kha,mithleh camhthiam riantuannak men maw a si ko kun hnga? Mah bantuk I, a thi men hnga cun an rak ruah bal lo. Isarel phun vialte a van liannganpi khomi Mesiah cu, hngah rih maw a hauh kun lai.  A zultu hna an lungder le ngaihchiat cu zoh ah zaangfak an ti ko.

Mah tluk cun an hnabei a dong an lung a rawk na cun, an lungne teah cun-khui kaah dik kan ruah thiam lo mi bia pa khatkhat a um lai; bia a rak kan chim tawnmi ah khan a sullam kan hmuh thiam lo mi a um rua; mah ti men cun a dih hnga maw – tiah lung thih lonak an ngei tthimtthim.

Nu hna tu nih cun a nun lio i a tuahnak le, a bia chimmi le a vel ngeihnak kong tu kha an ruat. Zeitin khum hmanh va si aikun, kha tluk mitha le mithiang kha cu anpilh kho ti bal rua hnga lo. A min an chim caan fate, a kong an vanceih than fate cu, dawtnak le hmaizahnak lungthin he ttheu an van theih zungzal ko lai. Mah caah cun Jesuh nu Johan nu, Mery Magdalin le an hawile hna cu zarh chun nitlak Jesuh nun lio kong cu an I ruah. Mah ti a ti kha, mah ti a tuah kha tiah pakhat le pakhat an I chim. Jesuh nu nih Mery Magdalin sinah, “ Tlang Cung Cawnpiaknak kha run kan chim rih tuah. Kei cu ka tar cang i, bia hi fiang in ka ciing kho lo” tiah a ti. Mery nih, Kha tlangcung i a rak kan cawnpiak lio ka vun ruah fate ka lungthin hi a nem dih i, thlansat lio kan tak a thur lio te I, tikik kholh bantuk khin ka thiangthan ti tluk lung ka ngei. A chimi cu a ning tein ka ciin ko. Aw hmanh ka hnathlam ahhin a cuang. Tlangbo ramhring lak ah a si I, anih bol ai te ah a tthu.  Zapi vialte a velchum ah kan tthu. A bia cu hitin a si.

 

  • Lungthin sifakmi cu, ttha chin an hmu:

zeitintiah, Vancung Pennak kha annih i a si.

  • Ngaih a chiami cu ttha chin an hmu:

zeitintiah annih cu an hna a ngam le lai.

  • Lung a nemmi cu ttha chin an hmu:

zeitintiah vawlei ro an co lai.

  • Dinnak kha hal le ttam bang a duhmi cu ttha chin an hmu:

zeitintiah zangfahnak kha an hmuh lai.

  • Lungthin a thiangmi cu ttha chin an hmu:

zeitintiah Pathian kha an hmuh te lai.

  • Remdeihnak sertu cu ttha chin an hmu:

zeitintiah Pathian fa tiah auh an si lai.

  • Dinnak caah serhsatnak kha a ingmi cu ttha chin an hmu:

zeitintiah Van cungpennak kha annih I a si.

  • Keimah caah mi nih an in volh hna, an in serhsat hna I, chiatkhatnak phunphun an in puh tik hna ah ttha chin nan hmu. I nuam u, ti awk ttha loin I lawm tuah u:

Zeitintiah Vancung khua ah nan laksawng cu a ngan hringhran: khi bantukin nanmah

hlanah Profet zong an rak sersat cang hna kha,; tiah a hawile theih awkah a vun chimpaik hna i, an dihlak an lunglen in an mitthli a tla. Sihmanhsehlaw ngaihchiat lungfahnak mitthli  si lo. Mah bia nih cun an lungthin a daihter ngaingai hna.

A thaizing cu khuafingcah cangka tein Mery Magdalin le a hawi nu rual nih pangpar an i put i, Jesuh thlan va zo awk le, chun nitlak mahka ahcun va tthut awkin an kal. Ngaihchiatnak lawngin ruah lengmah cu zei a tthahnem ttung lo tiah a nun lio kong cu an I ruah lengmag. Jerusalem khua a hung luh lio i , mi rel cawk lo I an rak don: “ Bawipa min in a ra mi cu thangtthat cu ko seh. Hosanna!, Hosanna!” tiah an rak aupiuak I a kalnak lam vialte tum hna le pangpar phunphun an vun phahpiak: an au thawng hmanh fing le tlang tlerh I a rak thannak hawi hna an ceih tthan i, caan tawite cu an lung a hung nuam tthan.

Thlan an vun naih i, an putmi pangpar le zihmui an vun chuah. Thlan cu an vun zoh. Ai! An kuhnak lung an tthil ai. Tlangbawi hna fialmi mi tthalo nih, a ruak tiangin an ngol lo hi ta. An kalpi maw, zoh tlak loin dah an ttuantaak cu tiah, thin tor lengmang in thlan cu an van bih. Jesuh ruak a um lo, an fir ai! Tha tein an vun ngiat i, a ruak tuamnak hawi hna cu, rep tein an bil i, a lu lei teah an chiah fawn ttung. An thlek an hmal ta ttung lo.

Mah ti khuaruahhar i, an um lioah cun an kiang velchum kha, khuasik lio inn awng I a rung lutmi nithlam bantuk khin a rung ceu. ZIalmal tein a tlaang hmasa i, a rauh hlanah an velchum vialte cu cer-pup  in a ceu. An mit an hun leh i, puna var ngaingai nin a thuammi, tlangval pan ziingzeeng tete pahnih an hmuh hna. An ceu tuk caah an zoh ngam hna lo i, an mit an thlak. “ Nan ngaihchiat le nan phannak vialte cu dih ko cang seh.  Nan run kawlmi nan Bawipa cu a nung tthan cang. Thihnak nih a tlai kho lo. Peter le a zultu hna kha vung chim hna u. Galilee ram ah rak kal hna seh. Khika ah an sinah a rung lang lai” tiah an ti i, hmuh manh hlanah an lo tthan. Tlangval sawhsawh an si lo: Vanmi an si!

Hmakhat te cu an lung a ar tthup ko. An theihmi aw le bia cu vawleicung ah theih tawnmi a si lo. Zei an ti hen a, an bia sullam cu….. A THO TTHAN! A THO TTHAN! Jesuh a thihnak in a tho cang, A NUNG! A NUNG!

 

Chinciah: a cunglei capar hi “Ka zahpi lo” By- Pu. Hrang Nawl cauk chung in ka lakmi a si. ” Kazahpi lo” cauk hi Pu. Hrang Nawl nih 1962 tluk hrawng ah khan a rak tialmi a si. 1999 laimi khrihfa kan thlinak kum-100 puai ah khan laica cauk cuah/ttialmi vialte lak ah a thabik ah an thim mi a si.

 

“GOOD FRIDAY”

 

Jerusalem sarthlan Golgattha cu a min hmanhah luruh hmun ti va si kaw, ni dang ahcun king rengruangin a um, zanlei caan hoi ahcun minung cu vun chim lo , uifir hmanh anmah lawng cun a ning a tti hnga. Asinain nihin cu rel cawk lo minung an khat dah ngai! Chun nilin lingte asi i, huthut in a sa. Zapi nih vun phanh khawh awk loin Rome ralkap nih an kulhmi, lung hrelhhrolh lakah, Jesuh le mifir pahnih hna cu an dir. An liang an leh hna i , ralkap nih an hnulei in an tlaih hna .

Jesuh le mifir hna cu an thil an phoih hna i , an taklawngin nilin ah zoh tlak loin an dir. An hmaika ah vailam thing pathum an chiah . Hling luchin hramhramin an rak chinh lio ah, a lu hmun tampi ah a pem i a thi le a thlan in a hma vialte a ttial dih. Tho nih an tlanh .Vun phenhainak kut zong cu a um ti fawn lo. Vailam thing ahcun ih an fial hna i , mifir pahnih hna cu an cawl, an ai, an kio. Ralkap nih an chuih, an lamh hna. Holh phun chia kipin an auh hna. Jesuh tu cu tuufa te bang amah ih in a it i, sersiam hau loin a za a zam. A kehlei mifir pa cu thir an khenh hmasa. An kio le an raak thawng cu mithla-kawk a bar ko.Minung aw hmanh a lo lo.

Jesuh nu, Mary Makdalin le an hawile hna cu mi karlakah an det chih hna i, Jesuh pum zong cu an hun hmu kho lo. Mifir pa ai le hraam an vun theih ahcun an chungril aa let. A theih an ngamh lo. Jesuh nu cu, mei kangh hma chem bantuk khin a thawin ‘aa ka fa’ tiah a ti lengmang.

Jesuh cu, a zaa phahpiak cia ahcun thirkhenh hngete ngaw hi an vun hmuah i, hmakhat an vun khenh ahcun, titsa hrat cu thawng a ngei lo, ‘cuk’ a ti. A fah maw thei lo sual lai ti bang, kut hnihhnih in na vun khenhchap. A mit a sur, a kam aa seh i, awn au lo tein aa in. A kut khatlei cu an vun khenh tthan . A fah tuk caah, a thaw chuah a sukin aa su. A kut a dih cun a ke hnihin thirkhenh ngan chinchinin an vun khenh. A nule nih cun,sobul thawng an theih . An hna an i phih, an ngai ngam lo. Mifir pakhat cu an vun ti ve i , ralkap pali nih an tlaih bu hmanh cun fawibai ah an khenh kho lo.

Vailam thing cu an vun tun `han. Ai zoh ngam ti lo. Jesuh kut le kut cu thi a dordor in a tla. A ke thi cu, tidong hlung luanin a luang.

A nganfah a celh lo i, a hnawng a mer lengmang. A nu nih voikhat te a hun zoh i, a ttih tuk ah, raihraang therh in a therh. Mary Makdalin cu siksek in a ttap. Jesuh nau hniang Saimon vun zoh ko ah, lung a faak. A mitthli kurkur in a luang. A kam aa seh, a kut a tum, a samh, a tum a samh . An hna hram in, tlangbawi le cathiam hna nih “Judah siangpahrang ka si na hei ti, mi na khamh khawh hna ah vun i khamh ngat” tiah cil an hei chaak, an nih a chuak na lo cun, an i nihter. Saimon cu a thinhun a celh lo. A pawng bik a dirmi tlangbawi cu vun zuanhnawh a zalh i, a nu nih a mit au cu vun hmu kaw, ‘ka fate’ tiah a tlaih.

Mah ti Jesuh nganfah i ai ngerh len lio ahcun a kehlei mifir pa nih ,“ Hei! Nazaret mipa, Khrih ka si na ti lo mei, vun i khamh tuah. Kanmah zong hi vun kan khamh chih tuah ,” tiah a ti pah, ai! tiah a ai pah. Khatlei ummi pa nih, “Maw, mifir ttha lo, na thih cuahmah lio hmanhah Pathian na ttih hin lo mu, Kanmah bantuk sualnak ngei ah dara na ruah hi,” tiah thinhung ngai in a vun ti . Jesuh lei a hoih i, “Jesuh, na Pennak na phaak tikah kei misual hi vun ka philh hlah mu,” tiah mitthli he a vun ti . Jesuh nih a celh na loin a hmai a vun panh i, “Bia ngaite kan chimh, keimah he Paradise ah na um lai,” tiah a hna a vun ngamter. Mifir pa cu lunglawmh tukah a lung a hno chin i, a ttah pah in, “Ka bawipa, ka nunchung vialte ka lung retheihnak cu, thilrit bang a tla cang. Hiti thih zong hi a ka fahter ti lo,” tiah a ti.

Mah ti mifir hna he an i chawnh cu a langin an hun hmuh nain, zeibia an chim cu an thei lo. Nganfah nem deuhnak ah tiah ralkap nih sii phun khat an vun chanh hna. Jesuh cu a ding duh lo. A nu nih a um nakin, “Ding hen ka fa,” tiah a rak ti lengmang. Hramhramin mi an keu hna i, vailamthing cu an hun naih deuh. Jesuh nih a mit a vun leh i, a nu le Zerusalem khuami Zan nih a dirpi hna kha a vun hmuh hna. A nu cu a vun zoh i, thei ual theilo ual khan “Zoh hmanh na fapa kha” tiah a ti. Johan cu a vun zoh ve i, “Zoh hmanh na nu kha,” tiah a ti ve tthiam tthiam.

Mahticun zoh ngam lo nganfak in, ni her sang tiang a um, “ Ka ti a haal” a ti i, ralkap nih fung ah puanchia an men an men i mah puanchia paar cu mitsurhang thor ah an hnim i, “Heh, tikik te hi ding tuah,” tiah a kaa ah an hun tuh.

Cun suimilam pathum hrawng ahcun a thi chuah cu aa zia deuh. Asinain a hma tho nih a tlanh i, sivang in an tuah. Nilinh zong cu a dai hlei lo. Mary Magdalin nih Jesuh hmai cu a zoh ngam lo . Vak tiah voikhat a hei zoh tawn i, a mit a chinh tthan ttheu. A mitthli tamtuk a tlaak cang caah a mit vialte a phing dih. A lung chung cu a ttap zungzal tthiam tthiam. Khua a phunphun a ruat. Jesuh a nun lio i, “Na sualnak cu ngaihthiam a si cang,” tiah a rak ti. A lunglawmh tuk i a mitthli a rak tlaak. Jesuh ke cung i a rak tlaak sual i, a sam i a rak hnawhpiak hoi kha a vun thei. Vailamthing cu a hei zoh  tthan i, awk filfial in a nganfah mah tluk a ti na, kaa khatte hmanh holh phun chia a vun chim lo. Hnahno ziik vun khiah, hmal, le par corhno vun hmeh bang, uai hninhniang in. Ka thin, maw ka sian lo a vun ti lioah khin Jesuh orhlei ke, thir an khenhnak hma in thi thar bawhlawhlok tiah a hung chuak i, a titsa vialte a caang dih . Mah ahcun Jesuh cu a nganfah a hung zual i, ai ngerh lengmang. A hun zoh ah, a chungril vialte aa let dih. “Ka zoh ngam lo, ka zoh ngam lo,” a ti i hnulei a chit.

 

Nunnem sualnak ngei lo, mitcaw kebei damtertu, 
Sifak michia le mi thurhnawm dawtu, mi zoh tlak loin, 
lainawng bang an in tar mu

Ka zoh ngam lo, an hliamhma lengluang,
Mi se-ei pawpi le cakei hrang an si kun ri lo,
Duh in an in hnawl maw, Hnah-te-no hninghniang.

Van arfi tengtung le hnahchawl zat lo.
Sing le za in an rel cawk hnga maw na van ralkap runrual,
Vung chim hna law Mikhael le a mi rual cu.

Kai-a-fas le a tlangbawi rual hna cu
Abraham le Isak fa khamhtu kan hngak an ti ttung
An mitmu cu van koih lang ka tinzum hin.

Thiang chin hmun an kai ah puanrang ti hna ,
An firkhuat le sualza an hleih pei an huh rua,
Ka ning an zak langta le thlan rang rual.

Ka zai ti lai lo vanbawifa ka tta,
Lung a nem mi cu ttha chin vawlei ro na ti lo mei,
Cungchin Vankhua theih lo lem si hlah mu….

Jesuh cu, a nganfah le retheih a celh ti lo i, ” Eloi, Eloi, Lema sabakthani- Ka Pathian, Ka Pathian zeicadah na ka kaltak” tiah a ai ruangmang. Jesuh nganfah le  aihram nih cun a orhlei mifirpa a ngaih a chiatter tuk i. ” Bawipa” tiah a vun zoh ahcun Jesuh nih, ” A dih cang” a ti i a thi.

 

Chinciah: A cunglei, lenhlawi hi ” KA ZAHPILO” By- Pu. Hrang Nawl chung in ka lakmi a si- Ca tialtu

Never Give Up

Hi vawlei ah hin, Sehtan pa nih thlaici a phunphun a vorh hna! Cu thlaici hna cu: Inn chungkhar ah lungretheihnak thlaici,kan nunnak khuallam ah lungre theihnak thlaici, duhfah hakkauh nak thlaici, lunglianhnak thlaici, Mi hnahcuahnak thlaici, khat le khat remlonak thlaici, tbk..a phunphun an si.

Voikhat cu mipa pakhat nih, Sehtan pa cu hi ti hin bia a hal? “Mah na thlaici lak ah hin, zei hi dah zumtu thinlung ah akeuh fawi bik mi le rian a tuan biak mi a si” ti ah a hal? Sehtan nih cun; «hi vial te ka thlaici lak ah hin zangder,thachiatnak thlaici hi minung thinlung ah akeuh a fawibik mi a si» a ti. Zangder nak thlaici cu minung thinlung ah ka hei vorh hnawh hna ahcun chikhat lo te ah an keu kho colh a ti. Mipa nih cun a thawh than i, «a si ah teh zeibantuk hna sin ahdah a keuh aharbiak ve» ti ah a hal than? Sehtan pa nih cun; Pathian a zum i a bochan mi hna le zei thil an ton hmanh ah Bawipa remruat a si ko a ti mi hna sin ahcun a keuh kho bak ve loh, ka hei vorh zong ah a rilh bak in an hung ril than ko an tang kho loh a ti.

Sehtan nih, nitin te zumtu kan nunnak ah “zangdernak”  khrihfabuu chungah zangdernak, hruaitu hna cungah zangdernak, hruaimi hna cungah zangdernak, kan zulhmi lam thluan chungah zangdernak tbk.. a kan vorh zungzal culio caan ahcun Pathin kha fekte in i tleih i a dawtnak tukha thukpiin a ruatmi hna sin ahcun cu thlaici cu a keu kho loh i an i lomhnak cu Pathian dawtnak tu ah khan a si zungzal.

U le nau hna nang teh nitin nanunnak lamthluan ah hin zei thlaici hi dah a keuh a harbik, i a keuh a fawibik? Kanhlawh a van thlindeuh le cangka hna in maw, phorhlawt nak thlaici hna hi nanunnak ah a keuh a fawituk sual maw? Midang ruahnak hna zeirel lo in lungpuamnak thlaici hna hi na nunnak ah a keuh a fawituk sual maw? Mah thatnak lawng i hmuh i midang thatnak hmuhpiak lo nak thlaici hna hi nanunnak ah a keuh a fawi tuk sual maw? Pathian a zumtak mi hna sin ah cun cu bantuk thlaici cu a keu kho bal lo. Nang na nunnak lamthluan ah, zeibantuk thlaici dah a keuh  a fawi bik? Ti hi, tifatin kan nunnak lamthluan ah, kan tonmi thilnih a kan hal I a kan zuamcawh zungzal ko.

Hi kan khual tlawnnak vawlei ah hin, a maw i a fiang lo mi vawlei ah khuallam kalmi kan si. Ram tha kan phan kan ti na in, “ vawlei thiam thiam ah kan phan” A caan ah cun min chiatnak nih a kan dawi, lungretheihnak he kan i then lo.

Hla phuahthiam nih,

  1. « Rili cung sangphawlawng cungah tthu in kual a thlawng mi kan si, a caan ah thlichia tilet ttihnung kan ton caan zong a um hna beih donghnak le ngeihchiat ttahnak nunnak nih a ton caan ah kan pawng ah bawmtu Jesuh kan ngei na  thin phanghlah.
  2. Rili cung sangphawlawng cungah tthu in kual a thlawng mi kan si, a caan ah zawtnak fahank ttihnung ruang ah, damnak tii bang in kan hlam, vawlei cung siibawi kawl in kan len lio ah kan pawngah chanhtu Jesuh Khrih kan ngei na thin phanhlah.

Phungthluk hmanh ah “Uico nih a bohmi poh khi mifir an si hleiloh” an ti bang, kan nunnak ah kan tonmi thil hna ruang ah hin mi sual hlei le mivanchia hlei kan si lo i kan Pathian dantat nak zong an si hlei fawn lo ti hi a si.

Kan tonmi thil ruang tu ah lungdong lo te in kan pawng ah canhtu/ bawmtu Jesuh Khrih kan ngei,  ti ruat bu in kan khuallam hi lunglawm te tu in zul ko u sih, ti sawm bu in…..

 

 

 

Sehtan nih a kan kawl tawn ko rua!

 

 

Mihrut le mitcaw bawlung an cuih le, mitcawn nih an teihna an ti. “Zeitindah mitcaw nih cun, an tei kawh hna”? anti, tikah. Kawlthlen hlan ahcun mihrut nih an tei ngaihna. A sinain Kawlthlen a hung tling I mitcaw nih cun, a kan tei tuk an ti i cuih hman an huam set ti lo nain, “cuihko rih uh «puai» dih hlan ahcun ngolphung a si lo cu the” an ti hna i an cuih pi thanhna. Mihrut pawl cu hruttuk hna kaw kawlthlen hnu zong ahcun kawlthlen le thlenlo zong cu an tuak ti loh/ kawl an I thlen le thlen lo zong an I thei ti loh, hehchet ti ah anmah kawl thing lei ah cun «pung.., pung..» in an chuih thluahmah le a caan a hung dih in kawl cu an van rel piak hna tik ah cun mihrut pawl cu mahduh poh le an I hoih nak siarem nak poh ahcun rak sut hna kaw anmah le anmah lawng te kawl-10 bak an rak I sut I, an sung ti a si. Hruh hrat le mahduh siarem ning ciopoh in rak cuih cio ko ahcun rak sungh lo awk an rak tha rualoh!

Hi a cunglei mihrut le mitcawn bawlung chuihnak nih hin, “Nun a kan chimh cio ko rua” ti ah, ka ruah, nitin zumtu kan nunnak zong ah hin; mahduh cio poh le siarem ning cio poh hna in kannun le hnu le hmai hna zoh lo duhpoh in bia hna kan chim tik ah hin; “a khrihfabuu in a si ah, committee pakhatkhat in asi ah, innchungkhar in a si ah, vawlei lei buu khatkhat a si ah a ping a pang hna in a kal sual tawn i «SEHTAN» kan ralpa nih hin, fawite in a kan kawl lengmang nak hna a si rua” ti hi, ka ruat tawn!

 

“Na kan len caah kan i lawm_voidang ah kan lengthante, Bawipa nih thluachuahnak in pe seh”